Afritað og klínt
Austurglugginn segir í frétt, eða öllu heldur óútskýrðri fréttatilkynningu, að fasteignamat á Austurlandi hafi hækkað um 4,6% og í Fjarðabyggð, í hverja heimaþorp mitt Stöðvarfjörður er innlimað, hefur það hækkað um 4,8%.
Ég fékk seðil inn um bréfalúguna í vikunni og tölurnar á honum sögðu mér að hver fermetri í húsinu mínu væri um fimmtíu þúsund króna virði en það sýnist mér vera lækkun frá því ég lét meta húsið fyrir um þremur árum síðan.
Í frétt Austurgluggans eru töflur sem eiga að sýna þessa hækkun fasteignaverðs en töflurnar eru án skýringa; það kemur hvergi fram fyrir hvað tölurnar í þeim standa.
Er t.d. sama hækkun á fasteignaverði á Mjóafirði og á Reyðarfirði sem eru innan sama sveitarfélags eða hefur ef til vill orðið lækkun og hækkun einhversstaðar í sama sveitarfélaginu, en þau eru ansi víðfem og fjölbreytileg innra.
Forvitnin er greinilega ekki að plaga þau á Austurglugganum.
